Rosario Ustáriz ha íu escribindo, ya en la madurez de la suya vida, unos políus poemas plenos de sentimiento que agora se replegan en este libro.

La primera vez que marqué sobre papel lo suyo sintir estié en 1982, cuando lo poema Remerando a Pedro que se'n fue chugando, gané l'Onso de Oro de lo concurso literario convocáu por lo Concello cheso. En ixe poema ya se dixan vier lo que son los pilás en do se refirman los suyos versos: la fonda sensibilidá con la que contempla todo lo que i-veye y pasa alredor suyo y lo ritmo en la combinación de las palabras, sin dicar de darli importancia a la rima y a lo rigor que imponen las silabas contadas y las combinacións d'estrofas. Gané otros dos Onsos de Oro (en 1983 y 1994), contando agora con una ampla y esmerada obra reconocida dentro y fuera d'Echo. En ixa obra, chunto con composicións dedicadas a las suyas viviencias mas fondas, ve enguisando una emocionada cronica de la Historia de la Val, de lo acontecíu en las zagueras veinticinco añadas, canta a los suyos incomparables paisajes y a las chens qu'en ella viven y describe las polidas tradicións de las que tan plena ibi-é la Val d'Echo.